Nostre eaige

Livret sommaire (1498)

335 Nostre eaige est brief ainsi comme des fleurs[1]
Dont les couleurs reluisent peu d’espasse
Le temps est court et tout rempliz de pleurs
Et de douleurs qui tout voit et compasse.
Joye se passe, on s’esbat, on solasse
Et entrelasse un peu de miel begnin
Avec l’amer du monde et le venin.

Force se pert, toute beauté finist
Et se ternist ainsi comme la rose
Qui au matin tant vermeille esparnist,
Au soir brunist, c’est donc bien de chose.
L’homme propose, en apres dieu dispose,
Faisons donc pose à tous mondains delis :
Laissons jardins, roses, flourons et lis.

Et ne plantons ou clos de nostre cueur
Dont la liqueur vault beaucoup s’elle est bonne.
Sinon trois fleurs de tres noble vigueur
Qui de langueur n’attaignent point la bonne
Tout bien foisonne et par accort résonne
Et s’amaisonne en ceulx qui dispensées
Ont ces trois fleurs qu’on nomme trois pensées.

L’une des trois quant bien la planterons
Tend ses flourons vers ung seul Dieu celeste,
L’autre à soy propre ancre ses navirons
Soubz termes rondz et sans quelque moleste,
La tierce est preste et sans cesser s’apreste
336 Que secours preste et aide a ses amys.
Dieu en bon cueur ses pensees a mys.

Et de rechief la premiere fleur gente
Tres diligente au temps passé revoit,
La seconde le temps present regente,
L’autre fulgente au futur temps pourvoit
Et le prevoit : ainsi doncques on voit
Que s’on avoit ces pensees ensemble
Impossible est d’avoir mal, ce me semble.

Car d’elles trois on peut faire ung blason
Qu’onques Jason n’en eut point de tel sorte
Quant il ala conquerre la toison.
Ains par raison est d’estoffe plus forte
Pallas l’assorte et Prudence le porte
Tout s’y comporte en vray mistere pur :
Le champ est d’or, les pensées d’azur.

Par l’or s’entent vertu resplendissant
L’azur plaisant, le hault ciel notiffie
Nombre de trois est tousiours florissant
L’escu luisant noble cueur signifie.
Qui se ralie à vertu tresiolie.
Et s’humilie envers dieu trine et ung.
Tendant au ciel faisant droit a chacun.

Flora produit maintes fleurs mignonnettes
Com jennettes soucie et marguerite
Mais dieu créa ces trois pensees nettes
337 Tant honnestes et de haultain merite
Si n’est licite à nul vent qui despite
Par art subite enverser ces fleurettes
Qui plaines sont de fines amourettes.

Et qui vouldra blasonner ces trois flours
Par autres tours et l’escu riche et cler
En sens moral ou aussi sur amours,
L’escu tousiours dénote bien celer,
L’or peu parler ; l’azur, bien besongner
Et se songner qu’on puist sans contredire
Penser, penser, penser, dire.

Ce fort escu qui tousiours est durant
Fut bon garant à maint fort champion
A maint fort duc et chevalier errant.
Honneur querant ainsi q’un Scipion
Or esperons que sans dilation
Tousiours ayons ceste targe dorée
De grans vertus remplie et décorée.[2]